ପିଲାଦିନ

 

ପିଲାଦିନ

_______ପ୍ରଦୀପ ନାୟକ

ଜୀବନ ଏମିତି ଭସାବାଦଲ ଯେ

ଭାସି ଭାସି ଚାଲିଯିବ

କଅଁଳ କାନ୍ଦର ପିଲାଦିନଟିଏ

ମନ କୋଣେ ଲାଖିଥିବ

ଅଫେରାବୟସ ପକ୍ଷୀର ଡେଣାରେ

ସମୟ ଯାଇଛି ଉଡ଼ି

ସୁଖର ସ୍ଵସ୍ତିକ ଚିହ୍ନ ଆଙ୍କିଅଛି

ଅଭୁଲା ସେ ସ୍ମୁତି ପେଡ଼ି  ।

କଷିଆମ୍ବ ଲୁଣ ବାଗୁଡ଼ି ଖେଳର

ସେଇ ଖରାବେଳ ସ୍ମୃତି

କଙ୍କି ପ୍ରଜାପତି ଧରୁଧରୁ ଯେବେ

ଦିନ ଯାଉଥିଲା ବିତି ।

ବମ୍ବେଇ ମିଠେଇ କିଣିବା ପାଇଁ କି

ମାଆ ପାଖେ କରେ ଅଳି

ଲୁଚିଲୁଚି ବାଇସ୍କୋପ ଦେଖିବାକୁ

କରିଛି କେତେଯେ ଚୋରି  ।

ଢାବଲପୁଆର ଖେଳରେ ଜିତିଛି

ମିଛିମିଛି କେତେ ଟଙ୍କା

ଖପରକାତିକୁ ମାରି ମୁଁ ଆଙ୍କିଛି

ଗଡିଆ ପାଣିରେ ଚକା  ।

ଟାୟାର ଗଡେଇ ଗାଁ ଦାଣ୍ଡଟାରେ

କେତେ ଉଡେଇଛି ଧୂଳି

କଅଁଳାବାଛୁରୀ ସାଥୀରେ  ଦଉଡି

ଆଣ୍ଠୁ ଛିଣ୍ଡେଇଛି ପଡ଼ି  ।

ରଫଖାତା ଚିରି ବରଷାଝଡିରେ

ଡଙ୍ଗା ଭସେଇଛି‌ କେତେ

 ଅଙ୍କ ସାରଙ୍କୁ ପରଖାତା ଟିପି

ଠକେଇଛି ଆହାଃ ଯେତେ ।

ବନିଶୀ କଣ୍ଟାରେ ଗୁନ୍ଥିଦେଇ ଜିଆ

ଧରିଛି କେରାଣ୍ଡି‌ କଉ

ଅଣବଣେ ପଶି ମହୁଫେଣା ପୋଡ଼ି

ପିଇଛି କେତେଯେ ମହୁ ।

ପାପପୁଣ୍ୟ ଭାବ ଫୁଟା ପକେଟରୁ

ହଜିଛି ଚାରେଣୀ ପରି

ଅଭାବ ଆସିକି ଖୁସିର ଦୁଆରୁ

ଖାଲିହାତେ ଯାଏ ଫେରି  ।

ନଈପାଣି ଯା' ବହିଯା' ନଈକି

ମନ ସିଲଟ ଲିଭେଇ

ଧୋଇ ନେଇଯା' ଦୁଃଖ ଶୋକ ଦାଗ

ସବୁକୁ ଭୁଲେଇ ଦେଇ  ।

ଲୋଡା ନାହିଁ ମୋର ଅୟୁତ ଦିନର

ଯଉବନ ଅବା ଧନ

 ଜୀବନେ ଏମିତି ଥାଆନ୍ତାକି ସଦା

ପିଲାମନ ପିଲାଦିନ  ।

_____________________

ବନ୍ଧପଡା, ମଦନପୁର, କେନ୍ଦ୍ରାପଡ଼ା